Česćeni wobydlerjo gmejny Njebjelčicy, k přinoškej w nowinje Sächsische Zeitung z dnja 02.06.2022 k wólbam jeničkeho kandidata za zastojnstwo wjesnjanosty Andréa Bulanka w gmejnje Njebjelčicy zabjeru stejnišćo w slědowacych dypkach.K wólbnemu programej Andréa Bulanka słušeja wosebje “wěrnosć a sprawnosć” kandidata za zastojnstwo wjesnjanosty gmejny Njebjelčicy. K tomu wupraju so ja, Tomaš Čornak jako amtěrowacy wjesnjanosta, takle:
W gmejnje Njebjelčicy bydli w pjeć wjesnych dźělach 1 200 wobydlerjow.
1. Wuprajenje Andréa Bulanka k nadpřerěznemu zadołženju wupraju korigujo:
LPo VwV Sakskeje je měritko na wosobu pola 850 € postajene. W gmejnje Njebjelčicy leži zadołženje na wosobu k 31.12.2022 pola 646, 50 €, potajkim jasnje pod sakskim měritkom. Posledni kredit gmejny pochadźa z lěta 2014 we wysokosći 250 000 € za twar noweje pěstowarnje.
Konto gmejny wupokaza k 31.12.2021 plus 271 618,18 € při wotewrjenych žadanjach plus 130 000 €. Rezerwa z eko-konta je 40 000 €. Z tym ma gmejna za přichodne lěta solidne finančne wuhotowanje.
Runočasnje su so w minjenych 32 lětach něhdźe 45 hektarow ležownosćow za twarske ležownosće, pola, łuki a lěs za naprawy zawěsćenja eksistency a energijoweho zastaranja kupili.
Gmejna ma tři přemysłownišća a z tym nadpřerězne dochody z přemysłoweho dawka w swobodnym staće Sakska a zhladuje na dobre demografiske wuwiće.
2. K wuprajenju Andréa Bulanka, zo bu před 20 lětami do gmejnskeje rady wuzwoleny, zdźělu k prawemu zrozumjenju, zo bu wón před něhdźe 20 lětami jako gmejnski radźićel woleny, je pak swoje zastojnstwo dočasnje zaso spušćił, hačrunjež nawjedowaše wón dźěłowu skupinu k wjesnemu wuwiću za wjesny dźěl Miłoćicy a je za zwoprawdźenje projektow zamołwitosć njesł.
3. K wuprajenju Andréa Bulanka k njespokojnosći w jednotliwych wjesnych dźělach poprawjam na tutym městnje, zo wobsedźi kóždy wjesny dźěl wuwićowu koncepciju a zo wotwisujo tež wot zhromadneho dźěła wobydlerjow z gmejnu, kak so projekty na dobro wšitkich zwoprawdźeja. To je so nam jara derje poradźiło. Na přikład ma wjesny dźěl Wěteńca z jenož 55 wobydlerjemi centralne zastaranje z pitnej wodu, zastaranje z płunom, spěšny internet, wjesna dróha a nadróžne wobswětlenje a wobnowjeny hašenski hat. W minjenym lěće je so zhromadnje z wjesnjanami planowało a natwariło nowe hrajkanišćo, kopanišćo a volleyballnišćo.
We wjesnym dźělu Miłoćicy ze swojimi 220 wobydlerjemi maja wobydlerjo jako wólnočasne móžnosće dwě hrajkanišći, jedne volleyballnišćo a kopanišćo, młodźinski klub a dom wjesneje zhromadnosće. Za městnu wohnjowu woboru kupi so w lěće 2021 twarjenje. W susodstwje kupi a wuwi gmejna spušćenu skału na socialno-kulturne srjedźišćo “Při Krabatowym kamjenju”, hdźež so kóždolětnje mjezynarodna dźěłarnička rězbarjow wotměje. Při Miłočanskej žabje wuwije so permakulturne srjedźišćo a připrawja so wurunanske naprawy přećiwo zemskej eroziji. Mnohe sadowcowe zahrody so zapołožichu. Runočasnje je so před dwěmaj lětomaj wutwariła dróha mjez Njebjelčicami a Serbskimi Pazlicami. Dobre žiwjenske wuměnjenja w gmejnje zawinuja dołhu lisćinu čakacych na bydlenja a twarnišća jednoswójbnych domow.
Za zwoprawdźenje projektow smy sej wjele mjezynarodnych mytow a Europske myto za wobnowjenje wjeski jako gmejna spožčene dóstali.
4. K wuprajenju Andréa Bulanka nastupajo wumjetowanja w interneće: k překwapjenju zwěsću, so dóńdźe w minjenych měsacach k wulkemu znjeměrnjenju we wobydlerstwje gmejny. Tute nasta přez rozdźělene lětaki, zapodate skóržby nastupajo zranjenje słužbneho dohlada a přez anonymnu internetowu stronu, kotraž je we wukraju přizjewjena. Tam šěrjachu so łžě a desinformacije přećiwo dobremu wuwiću gmejny Njebjelčicy. André Bulank njeje so wot tuteje internetoweje strony distancował. Skerje nawopak posudźuje tutu stronu jako zajimawu a informatiwnu.
Po wuprajenju z dnja 05.06.2022 w Serbskim rozhłosu sćelaka MDR a 25.05.2022 w nowinje Säschsische zeitung chce André Bulank tute strony jako žórła informacijow za dalše rozjasnjenja wužiwać. Je znate, zo su so wšitke wumjetowanja přez ministerstwo za nutřkowne a krajnoradny zarjad Budyšin rozjasniłe. Přećiwo wudawaćelam kriminelnych stronow je so ze stron sakskeho zamołwiteho za škit datow a policije zahajiło přepytowanje.
Tomaš Čornak
